Zindagi Ka Akhri Mor: Jab Ek Sakht Dil Pighal Gya

Kuch log apni puri zindagi apni marzi se jeete hain. Ghar me unki chalti ha, unka faisla akhri samja jata ha aur unki narazgi se bachne ke liye log apni khawaishon tak ko daba dete hain. Lekin kabi kabi zindagi ke akhri morh par insan ko ehsas hota hai ke jis ikhtiyar ko wo apni taqat samajta raha, usi ne uske apnon ke darmiyan kitni duriyan paida kar di thin.

Ye kahani ek esi hi buzurg aurat ki hai, jinki zindagi ke akhri 6 mahine unki pehle ki puri zindagi se mukhtalif the.

Ek sakht mizaj Aurat

Wo apne ghar ki mazbut aur sakht mizaj aurat samji jati thin. Unki marzi ke bagair ghar ka koi kaam hona mushkil tha. Wo chahti thin ke har shakhs unki baat maane, har faisla unki pasand ke mutabiq ho aur ghar ke log unke banaye hue usulon par chalte rahain.

Unki zindagi me mohabat bi thi, lekin us mohabat ke sath ikhtiyar aur sakhti ka rang itna gehra tha ke kai rishton me narmi ki jaga hi na bachti.

Unke shohar unke mizaj ko samajte the. Wo jab kabi kisi ke sath na-insafi hoti dekhte, to uske haq me bolte. Is baat par ghar me ikhtilaf bi hota, narazgiyan bi hotin. Lekin wo apni baat kehne se peeche nahi hate.

Unke jane ke baad ghar ke halaat aur zyada ulajhte chale gye. Kuch rishton me dakhal barhta gya aur jin logon ko apni zindagi sukoon se guzarne ka haq tha, unke liye ghar ka mahol mushkil hota gya.

Waqt guzarta rha. Har shakhs apni jaga masroof hota gya. Lekin us buzurg aurat ke dil me shayad kuch ese ehsas jama hote rahe jinhain wo khud bi puri taran samaj nahi pa rahi thin.

Phir zindagi ne ek esa morh liya jis ne unka mizaj badal diya.

Unke akhri 6 mahine pehle ki zindagi se bilkul mukhtalif the. Jo aurat kabi har baat par naraz ho jati thi, ab choti choti baton par muskura deti. Jo kabi apni marzi manwane par zor deti thi, ab narmi se baat karti. Unki zuban par duaein rehti thin. Wo apnon ka haal puchti, unke saath waqt guzarna chahti aur kabi kabi apni purani baton par afsos ka izhar bi karti thin.

Unki muskurahat me ek nayi narmi thi. Wo ab pehle jaisi nahi rahi thin.

Unke qareebi logon ko mehsus hota tha ke shayad unain apni guzri hui zindagi ka hisab samaj ane laga ha. Shayad unain ehsas ho rha tha ke jin rishton ko unon ne apni sakhti aur faislon ke zariye sambhalna chaha, uni me kitni takleef paida hui.

Maafi jo dil se nikli

Sab se gehri baat ye thi ke unon ne apni ghaltiyun ko tasleem karna shuru kar diya tha.

Unon ne apni us bahu se apni guzri hui tamam ghaltiyun ki maafi mangi jinon ne sari zindagi unki khidmat ki. Jawab me nihayat adab se kaha gya:

"Ap barhi hain. Maafi mang kar hume sharminda kar rhi hain"

Ye jawab sirf alfaz nahi the. Is me purani takleefon ke bawajood buzurgi ka ehtram bi tha aur rishton ko izzat dene ka wo saleeqa bi jo har kisi ke bas ki baat nahi hota.

Dadi apne dil ki baatain bi usi bahu se share karti thin. Unain ghar ke halaat ka bi pata tha aur un logon ke rawaiyon ka bi jin ki waja se Dadi pareshan rehti thin.

Dadi shayad ye bi janti thin ke unki wo bahu unki madad karna chahti hain, Lekin ab halaat unke haath me nahi rahe. Wo khud bi samajti thin ke aulad ko itna ikhtiyar dene aur waqt par unain rokne ki zimmedari unki apni bi thi.

Akhri waqt me apni marzi ki khawaish

Ab wo chahti thin ke unain apni marzi se jeene diya jaye. Wo betiyun ke dabao se door rehna chahti thin. Unki khawaish thi ke wo apne bharosemand rishton ke paas waqt guzar sakain.

Wo apni us bahu se milna chahti thin. Unain apne paas bulana chahti thin. Kabi apni pareshani ka izhar kartin aur kabi saaf alfaaz me kehti thin:

"Muje chor do. Mere paas se chale jao."

Lekin unki baat ko sanjeedgi se nahi liya gya. Unke badle hue rawaiye aur unki pareshani ko unki bemari ka asar keh kar nazarandaz kar diya gya.

Ye kitna ajeeb hota hai ke jab insan bol sakta ho lekin koi sunne wala na ho, to uski tanhai kitni gehri ho jati ha.

Wo kehti thin ke unain apni us bahu se milne nahi diya jata. Wo unke paas ana chahti thin, unke saath rehna chahti thin, lekin halaat unki marzi ke mutabiq nahi the.

Unain apne ghar ke logon ke rawaiyun ka bi andaza ho chuka tha. Wo apne tajurbe apni us bahu ke sath share kartin, logon ke bare me apni samaj batatin aur baar baar samjati thin ke har shakhs par ankh band kar ke bharosa nahi karna.

Unain fikr thi ke unke jane ke baad unke apnon ko mazeed takleef na uthani pare.

Wo sirf apne liye pareshan nahi thin. Unain un logon ki bi fikr thi jo unke baad is ghar ke halaat ka samna karne wale the.

Nafrat nahi thi, bas afsos tha

Us bahu ki ek beti thi jo apni Dadi se bohot muhabbat karti thi.

Haan, usy unke rawaiye se takleef hoti thi. Ammi ke saath hone wali na-insafi dekh kar dil dukhta tha. Kabi afsos hota tha ke wo esa kun karti hain, apnon ko itni takleef kun deti hain. Lekin uske dil me unke liye nafrat kabi paida nahi hui.

Akhir wo uski Dadi thin. Usy unse mohabat thi.

Shayad bachpan se dil me basa hua rishta itni asani se khatam nahi hota. Wo unki galtiyun ko galat samaj sakti thi, unke faislon se ikhtilaf kar sakti thi, lekin unse mohabat karna nahi chor sakti thi.

Uske dil me unke liye nafrat nahi, sirf afsos tha.

Afsos is baat ka ke kash wo pehle hi apne rishton me itni narmi le atin. Kaash unain apni galtiyun ka ehsas itni dair se na hota. Aur kash unki zindagi ke akhri din itne mushkil na hote.

Ek akhri mulaqat

Unke akhri dinon ki ek mulaqat esi thi jo aj bi dil me mehfooz ha.

Ghar me us waqt koi aur maujud nahi tha. Unki poti ko milne ka moqa mil gya to wo gai aur unain galay laga liya. Dono der tak ek doosre se lipte rahe. Koi khas baat nahi hui. Koi lambi guftagu nahi hui. Bas khamoshi thi, mohabat thi aur ek esa sukoon tha jise alfaz me bayan karna mushkil ha.

Unon ne bi apni poti ko galay lagaya.

Wo har mulaqat me duaein deti thin. Unki zuban par apnon ke liye dua hi rehti thi. Unke paas dene ke liye shayad ab zyada kuch nahi tha, lekin duaein ab bi bohat thin.

Kisi ko kya maloom tha ke ye mulaqat itni yaadgar ban jayegi.

Phir ek din unke jaane ki khabar mili.

Dil me ek hi khayal baar baar aaya:

Kash ek baar aur mulaqat ho jati.

Kash ek baar aur galay laga leti.

Kash unain keh sakti:

"Muje chor kar na jain."

Lekin zindagi me kuch mulaqatain akhri hoti hain aur insan ko unka ehsas baad me hota ha.

Unke jane ke baad

Unke jaane ke baad kuch ese halaat samne aye jin ke bare me wo pehle hi khabardar kar chuki thin. Jin baton ko kabi unki pareshani ya ghalat fehmi samja gya tha, waqt ke sath unka matlab samaj ane laga.

Ammi ko bi bohat kuch sehna parha. Kabi khamoshi, kabi sabr aur kabi apni baat aur sach samne rakhne ki koshish. Dadi ki akhri naseehatain bar bar yaad atin. Unki kahi hui baatain ab aur zyada samaj ati thin.

Lekin afsos, jinain unki zindagi me unki baat samajni chahiye thi, unain aj tak shayad uska ehsaas nahi hua.

Lekin is kahani ka maqsad kisi ko mujrim thehrana nahi. Ye ek ese ghar ki kahani ha jahan mohabat bi thi, ghaltiyan bi, na-insafi bi aur maafi ki koshish bi. Har rishta apni jaga pecheeda tha aur har shakhs apne tajurbon ke sath jee raha tha.

Is kahani se milne wala sabaq

Is kahani me koi ek shakhs puri tarah be-aib nahi.

Wo buzurg aurat bi apni zindagi me kai galtiyan karti rahi. Unon ne kuch rishton ko zaroorat se zyada ikhtiyar diya, kuch logon ke sath na-insafi ko waqt par nahi roka aur kai dilon ko takleef pohanchai. Lekin unon ne apni zindagi ke akhri hisse me apni galtiyon ko pehchana. Unon ne maafi mangi aur apne rawaiye me narmi paida ki.

Ye bi sach ha ke buzurg hona kisi ko ghaltiyun se bari nahi kar deta. Lekin kisi buzurg ki kamzori ke waqt uski marzi, izzat aur azaadi ka khayal rakhna bi ghar walon ki zimmedari ha.

Rishton me mohabat ka matlab sirf kisi ko apne paas rakhna nahi hota. Kabi mohabat ka matlab uski baat sunna, uski khawaish ka ehtram karna aur use apni zindagi ke faisle khud karne dena bi hota ha.

Aur sab se zaruri baat: maafi mangne ke liye zindagi ke akhri dinon ka intezar nahi karna chahiye. Agar humse kisi ka dil dukha ha, to waqt rehte uska ehsas kar lena chahiye. Kunke har kisi ko apni galti sudharne ka mauqa nahi milta aur har rishta hamesha ke liye hamare paas nahi rehta.

Kuch log jaane ke baad bi apni duaein, apni baatain aur apni yaadain chor jate hain.

Aur kuch akhri mulaqatain esi hoti hain jinain yaad karke insan zindagi bhar bas yahi sochta rehta ha:

Kash wo thori dair aur ruk jate.

— Rooh Ki Awaz