Wo Kahani Jo Zindagi Badal De!

Main hamesha se ek khayalon me rehne wali larki rahi hun. Muje naye naye qisse sochna, kahaniyan banana, novel ke kirdaron me kho jana aur apni imagination ki duniya me safar karna bohot pasand ha. Kabi kisi anjan chehre ke liye kahani bun leti, kabi kisi ese rishte ka tasavur karti jo shayad haqeeqat me mumkin hi na ho.

Mere liye khayalon ki duniya hamesha ek khubsurat jaga rahi ha. Lekin muje kabhi andaza nahi tha ke haqeeqat me bhi koi kahani itni khubsurat ho sakti ha ke wo meri soch ka pura nazariya hi badal de.

Ye kahani muje meri university ki ek fellow se malum hui. Hamari mulaqat bilkul am si thi. Ahista ahista jan pehchan hui, baatain barhin aur phir ek din usne apni zindagi ka wo hissa mere samne rakha jisne muje andar tak hila diya.

Ek Anjaan mulaqat, ek anokha rishta

Uski mulaqat ek larke se social media par achanak hui thi. Pehle us larke ne hi rabta kiya tha aur wo us me dilchaspi lene laga. Larki ki adat thi ke wo logon ke rawaiye, unki fitrat aur unke iradon ko samajne ke liye unain azmati thi.

Usne bi us larke ko samajne ki koshish ki. Jab use laga ke wo sach me ache dil ka aur mukhlis insan ha, to usne larke ko saaf bata diya ke wo sirf uska rawaiya janch rahi thi aur ab rabta khatam karna chahti ha.

Larke ne uske faisle ka ehtram kiya. Usne use roka nahi, apne jazbaat ka izhar bi nahi kiya. Lekin shayad dono ke darmiyan ek aisa lagao ban chuka tha jise samajne me abi waqt lagna tha. Kuch arse baad rabta dobara shuru ho gya.

Wo larki pehle hi apni zindagi ko lekar uljhan me thi. Use nahi pata tha ke wo kya chahti ha aur kya nahi. Na wo kisi par asani se bharosa karti thi, na kisi ko apne dil me jaga deti thi. Wo sab se alag rehna pasand karti thi.

Lekin pata nahi kab aur kaise wo larka khamoshi se uski zindagi ka hissa ban gya.

Wo use khud se zyada samajta tha

Larke ne apni zindagi ke raaz, apne dukh aur apni bohot si baatain uske samne rakh di thin. Wo ek businessman tha, duniya dekhi thi, mukhtalif logon se mila tha. Uski nazar me wo larki bohot masoom, cute aur sab se alag thi.

Ajeeb baat ye thi ke larki khud apne aap ko itna nahi samajti thi jitna wo larka use samajne laga tha. Wo uski khamoshi, uske dukh aur uske badalte hue jazbaat ko bina kahe mehsus kar leta.

Larki ne ek baar us sy pucha ke akhir wo usme esa kya dekhta ha?

Usne jawab diya ke business ke silsile me uska samna bohot si larkiyun se hua tha. Usne duniya dekhi thi, har tarah ke insan dekhe the, lekin usne kabi us jesi larki nahi dekhi thi.

Phir usne ek aisi baat kahi jo larki shayad kabi bhula na saki:

“Tum galat waqt me paida ho gai ho. Ye duniya tumhare layak nahi ha.”

Wo use apni “Pari” kehta tha. Wo chahta tha ke uski masumiyat aur sadgi hamesha salamat rahe. Usne duniya ke bohot se rang dekhe the, lekin wo nahi chahta tha ke duniya ke bure tajurbe us larki ki masumiyat cheen lain.

Mohabat, magar Allah ki raza ke sath

Dono jante the ke wo ek dusre ke liye na-mehram hain aur is tarah rabta rakhna unke liye ek nazuk masla ha. Larki use baar baar is baat ka ehsas dilati thi. Dono ne door hone ki koshish ki, magar unke liye ye asan nahi tha.

Akhir dono ne Allah se panah mangi ke wo kisi gunah me na parhain.

Wo larka, jise pehle shadi me koi khaas dilchaspi nahi thi aur na hi koi larki pasand ayi thi, ab usi larki ke liye nikah ka irada kar chuka tha. Wo uske parents se milne ke liye bi tayar tha. Use bas larki ki razamandi chahiye thi.

Lekin larki jazbaat me a kar koi faisla nahi karna chahti thi. Usne apna mamla Allah par chor diya. Wo nahi chahti thi ke uski pasand ki waja se koi us par ungli uthaye. Larka bi uski soch aur izzat ka khayal rakh raha tha aur sahi waqt ka intezar kar raha tha.

Is intezar ke doran uske darmiyan koi bi nazeba guftagu nahi hui. Larka apni zindagi ke tajurbe share karta aur larki ko uski apni achaiyun ka ehsas dilata rehta.

Waqt ke saath uski mohabbat me shiddat barhti gai. Wo larki ke mamle me bohot hassas ho gya tha. Uske liye larki ko soche bagair ek lamha guzarna bi mushkil hone laga. Larki ke liye ye sab naya tha, lekin larka janta tha ke wo abi in jazbaat ko samajna seekh rahi ha.

Dono ke dil me ek ajeeb sa sukoon tha. Mustaqbil ka ek khoobsurat khwab tha—nikah ka khwab.

Pandra din ki khamoshi

Phir achanak sab kuch badal gya.

Wo larka apni zindagi me bohot kamyab tha. Uski kamyabi ke sath aas paas hassad bi barhta ja raha tha. Aur phir ek din achanak uska accident ho gya.

Larki us se bohot door thi. Use kuch pata nahi tha. Na koi khabar, na koi paigham. Pandra din tak larka bilkul gayab raha. Larki ko samaj nahi a raha tha ke wo kahan hai aur kun rabta nahi kar raha.

Phir pandra din baad use pata chala ke wo larka duniya se rukhsat ho chuka ha.

Larki bilkul blank ho gai.

Uske zehan me sawal hi sawal the: Ye kesi azmaish thi? Kya ye koi saza thi? Yan phir us larke ke liye is duniya ke dukhon se nijat ka zariya?

Uske paas na koi akhri paigham tha, na koi voice note, na koi nishani. Usne baar baar larke ke number par mesages kiye, calls ki, is umeed me ke shayad koi jawab de de, shayad koi use kuch bata de. Lekin kuch bi hath na aya.

Wo shakhs jo kabi uski har khamoshi samaj leta tha, is bar apni khamoshi ki waja bi nahi bata saka. Aur khamoshi se hi duniya se chala gya.

Ek bicharna, jisne zindagi badal di

Us larke ke jane ke baad larki ki duniya badal gyi. Uski soch badal gyi, uski khamoshi badal gyi aur sab se barh kar Allah se uska taluq mazboot ho gya.

Larke ki zindagi me bi ek waqt aisa aya tha jab wo namazain parhne laga, duain karne laga aur logon ki madad karne laga. Ramzan me usne pehle se zyada ibadat ki. Dua ki qubooliyat ke auqaat me bi dua karta aur larki ke liye sab se pehle dua-e-khair mangta.

Larki ne us sy bohot kuch seekha. Uska zindagi me ana larki ke liye ek tohfa tha—ek sunehra khawab. Wo use aj bi yaad karti ha, uske liye dua karti ha aur dil me umeed rakhti ha ke agar Allah ne Jannat naseeb ki, to shayad wahan dobara mulaqat ho.

Jab mene apni university fellow se ye kahani suni, to mera apna nazariya bi badal gya. Main jo hamesha khayalon ki duniya me kahaniyan banati thi, pehli baar sochne par majbur hui ke haqeeqat bi kabi kabi khayalon se zyada gehri aur khubsurat ho sakti ha.

Muje samaj aya ke har khubsurat kahani ka anjam milan nahi hota. Kuch log zindagi me bohot mukhtasir waqt ke liye ate hain, lekin apne peeche esa asar chor jate hain jo salon tak dil me zinda rehta ha.

Shayad kuch rishte mukammal hone ke liye nahi, balke insan ko kuch sikha kar badal dene ke liye hote hain.

Aur kuch kahaniyan…

Na kitabon me mukammal hoti hain, na alfaaz me bayan.

Woh bas dil mein rehti hain.

— Rooh Ki Awaz