Sassi Pannu Ka Mazar_Aankho Dekha Hal

Sassi Pannu ki mohabbat ki dastaan hum ne geeton me, shairon me aur filmon me bohat suni thi. Lekin 27 July 2025, Itwaar ki seh-pehar 4 baje, hum ne faisla kiya ke kyun na is ko apni aankhon se dekh kar aayen.

Hum Karachi se Hub Chowki ke raste gaye thay. Ab to MashaAllah Hub Chowki ko zila ka darja de diya gaya hai. Ye Karachi border se Balochistan ka pehla zila hai.

Hum Punjab, Multan se safar kar ke aaye thay, is liye bohat thak gaye thay. 2 din hum kahin nahi ja sake. Teesre din irada bana ke aaj Sassi Pannu ke mazar pe chalte hain.

Sassi Pannu Kon Thay?

Jo log nahi jaante un ko bata doon, Sassi Bhambhor ke Raja ki beti thi aur Pannu Makran ke Baloch sardar ka beta tha. Dono ne aik doosre se be-panah mohabbat ki thi. Log kehte hain Sassi ne Pannu ke peeche paidal registan me safar kiya tha aur wahin jaan de di thi. Is liye aaj bhi is mohabbat ko Sindh aur Balochistan ki sab se sachi mohabbat mana jata hai. Yahi wajah hai ke log aaj bhi is mazar pe haazri dete hain aur apni mohabbat ke liye duaein mangte hain.

Hub Chowki Se Mazar Tak Ka Safar

Hub Chowki se mazar tak ka safar 40 kilometer hai. Is me 20 kilometer pakki road hai aur 20 kilometer kacha aur pathreela rasta hai.

Agar aap ka kabhi jana ho to petrol aur khane ka samaan sath le kar jana. Road se utarte hi 5 kilometer baad pahari rasta shuru ho jata hai jo Windar aur Lasbela Makran ko milata hai.

Ye rasta qadeemi guzargah hai. Jab log tijarat ke liye Balochistan se isi raste Sehwan Sharif, Dadu, Sukkur, Sindh aur Punjab jate thay.

Woh Nishan Jo Aaj Bhi Mojood Hain

Raste me ek wadi aati hai, khai nadi, jo raste ke beech me guzarti hai. Yahan se Pannu apne tijarti qafle ke sath guzarta tha. Us ke pairon aur oonton ke pairon ke nishan aaj bhi mojood hain. Nishanon se pata chalta hai ke us waqt logon ke qad bare hote thay.

Hum 2 pahari raste uboor kar ke pohonch gaye. Wahan aaj kal hotel aur chand dukaanen ban gayi hain. Peene ke saaf paani ke ghare matke mojood hote hain.

Mazar Pe Kya Dekha?

Dono ki ek hi qabar hai, ek hi mazar hai. Dono ek hi qabar me madfan hain. Mazar ke sath ek masjid bhi mojood hai jise Aashiqana Masjid kehte hain. Us ke sath ek aur qabar bhi hai jis pe likha hai ke ye woh gawah hai jis ne Sassi Pannu ko yahan apni aankhon se dekha hai.

Hum ne wahan chand ghante guzare aur ye yaadgar history aap tak pohoncha di.

Sassi Pannu ki mohabbat aaj bhi Balochistan aur Sindh ke logon ke dilon me zinda hai. Log door door se is mazar pe dua mangne aate hain. Maine khud wahan logon ko rote hue dekha. Agar pasand aaye to apni raaye comments me zaroor den.

Wahan Ke Log Kaise Hain?

Wahan ke log bohat mehmaan-nawaz hain. Hum jab pohonche to hotel wale ne pehle paani pilaya, phir chai pilai. Us ne paisay bhi nahi liye. Us ne kaha, aap humare mehmaan ho, Sassi Pannu ke mehmaan ho. Balochistan ke logon ka dil bohat bara hota hai. Wo ajnabi ko bhi apna bhai samajhte hain. Hum ne wahan ke bachon se baat ki, wo bhi Sassi Pannu ki kahani sunate hain. Un ke liye ye sirf kahani nahi hai, ye un ki pehchan hai. Buzurg log kehte hain ke jo sachi mohabbat karta hai, wo yahan aa kar dua mangta hai to us ki dua zaroor qabool hoti hai.

Wahan Kya Khana Mila?

Wahan hotel pe hum ne Sajji khayi. Balochistan ki Sajji to poori duniya me mashhoor hai. Gosht ko aag pe bhun kar banate hain, aur sath roti dete hain. Sath me doodh ki lassi bhi mili. Thakawat ke baad wo khana bohat maza de gaya. Agar aap jao to Sajji zaroor khana. Aur sath me khajoor bhi milti hain, jo Makran ki mashhoor khajoor hain. Hum ne kuch khajoor ghar ke liye bhi le li thin.

Aashiqana Masjid Ki Khaas Baat

Mazar ke sath jo masjid hai, us ko log Aashiqana Masjid kehte hain. Kehte hain ke yahan aashiq log aa kar namaz parhte thay aur apni mohabbat ke liye dua mangte thay. Masjid choti si hai, lekin bohat purani hai. Us ki deewaron pe aaj bhi purane waqt ke nishan hain. Wahan khamoshi itni hai ke dil ko sakoon mil jata hai. Hum ne wahan Asar ki namaz parhi. Namaz ke baad hum ne der tak wahan baith kar socha ke mohabbat kitni bari cheez hai. Aaj kal ki mohabbat to mobile pe hoti hai, lekin Sassi Pannu ki mohabbat paidal registan me chal kar nibhai gayi thi

Raste Me Kin Cheezon Ka Khayal Rakhen?

Agar aap bhi jana chahte hain to meri ye naseehat yaad rakhen. Pehli baat, gaari achi halat me ho, kyun ke 20 kilometer kacha rasta hai, pathar bohat hain. Doosri baat, petrol full karwa ke jao, raste me petrol pump nahi hai. Teesri baat, paani aur khana sath le kar jao. Chothi baat, din ki roshni me safar karo, raat ko pahari rasta khatarnak ho sakta hai. Paanchwi baat, apne sath aik local banda le jao jo rasta janta ho. Hum ne bhi aisa hi kiya tha, is liye hum aasani se pohonch gaye.

Meri Aankhon Dekhi Baat

Log poochte hain ke Sassi Pannu ki kahani sachi hai ya jhooti? Main ne jo apni aankhon se dekha, wo ye hai ke un ki qabar aaj bhi hai, un ke pairon ke nishan aaj bhi hain, aur logon ke dilon me un ki mohabbat aaj bhi zinda hai. Is se bara saboot aur kya ho ga? Zindagi me aik dafa Sassi Pannu ke mazar pe zaroor jao Lekin acha lagta he jb insan kise Hastrt pe bat karta he life ka sestm samjh ajta he phir lekin hum log phir bhe nahe samjhte