نفسانی خواہشات عقل کی دشمن ہوتی ہیں۔

نفسانی خواہشات

اللہ تعالیٰ نے انسان کو سب مخلوقات سے افضل بنایا ہے، اور اس کی سب سے بڑی وجہ عقل ہے۔ عقل ہی وہ نعمت ہے جو انسان کو جانوروں سے الگ کرتی ہے۔ عقل انسان کو بتاتی ہے کہ کیا صحیح ہے اور کیا غلط ہے، کیا حلال ہے اور کیا حرام ہے، کس کام میں فائدہ ہے اور کس کام میں نقصان ہے۔

لیکن انسان کے اندر ایک اور طاقت بھی ہے جس کا نام نفس ہے۔ نفس انسان کو ہمیشہ اپنی خواہشات کی طرف بلاتا ہے۔ نفس کہتا ہے جو دل چاہے وہ کرو، جو مزہ دے وہ کرو، جو آسان لگے وہ کرو۔ جب انسان نفس کی بات مان لیتا ہے تو اس کی عقل کمزور ہو جاتی ہے۔ اسی لیے کہا جاتا ہے کہ نفسانی خواہشات انسانی عقل کی سب سے بڑی دشمن ہوتی ہیں۔

عقل اور نفس کی لڑائی

انسان کی زندگی میں ہر روز عقل اور نفس کی لڑائی ہوتی ہے۔

عقل کہتی ہے، صبح اٹھ کر نماز پڑھو، نفس کہتا ہے، ابھی سو جاؤ، تھوڑی دیر اور سو جاؤ۔

عقل کہتی ہے، محنت کرو، حلال کماؤ، نفس کہتا ہے، جلدی امیر بننے کے لیے جھوٹ بول لو، دھوکہ دے دو۔

عقل کہتی ہے، موبائل بند کر کے پڑھائی کرو، نفس کہتا ہے، ایک ویڈیو اور دیکھ لو، کیا فرق پڑتا ہے۔

عقل کہتی ہے، غصہ مت کرو، صبر کرو، نفس کہتا ہے، بدلہ لو، اس کو جواب دو۔

جو انسان اس لڑائی میں عقل کی بات مان لیتا ہے، وہ کامیاب ہو جاتا ہے۔ اور جو انسان نفس کی بات مان لیتا ہے، وہ آہستہ آہستہ بربادی کی طرف چلا جاتا ہے۔

خواہش عقل پر کیسے غالب آتی ہے؟

نفسانی خواہش پہلے بہت چھوٹی ہوتی ہے۔ ایک چھوٹا سا خیال آتا ہے۔ انسان اس کو معمولی سمجھتا ہے۔ پھر وہ خیال بار بار آنے لگتا ہے۔ پھر دل میں اس کی خواہش پیدا ہو جاتی ہے۔ پھر انسان اس خواہش کو پورا کرنے کے لیے بہانے ڈھونڈتا ہے۔

وہ کہتا ہے، سب لوگ کرتے ہیں، ایک بار کرنے سے کیا ہوگا، اللہ معاف کر دے گا، بعد میں توبہ کر لوں گا۔ یہ سب بہانے دراصل نفس کے دھوکے ہوتے ہیں۔ جب انسان ان بہانوں کو مان لیتا ہے تو اس کی عقل اندھی ہو جاتی ہے۔ اس کو گناہ گناہ نہیں لگتا، غلط کام غلط نہیں لگتا۔

مثال کے طور پر، ایک طالب علم کو معلوم ہوتا ہے کہ موبائل پر غلط چیزیں دیکھنا اس کی پڑھائی اور اس کے دل کو خراب کر رہا ہے، لیکن نفس کی خواہش اس کو بار بار اسی طرف لے جاتی ہے۔ اس کی عقل کہتی ہے، یہ غلط ہے، لیکن خواہش اس کی عقل کی آواز کو دبا دیتی ہے۔

اسی طرح ایک تاجر کو معلوم ہوتا ہے کہ جھوٹ بول کر پیسہ کمانا حرام ہے، لیکن دولت کی خواہش اس کی عقل کو ختم کر دیتی ہے۔ وہ تھوڑے سے فائدے کے لیے اپنی آخرت برباد کر دیتا ہیں

۔آج کے دور میں نفس کی طاقت

آج کا دور نفسانی خواہشات کا سب سے خطرناک دور ہے۔ پہلے زمانے میں گناہ کرنے کے لیے محنت کرنی پڑتی تھی، آج گناہ ایک کلک پر موجود ہے۔ موبائل، انٹرنیٹ، سوشل میڈیا نے نفس کی خواہشات کو بہت طاقتور بنا دیا ہے۔

نفس کہتا ہے، صرف ایک ویڈیو دیکھ لو۔ پھر دوسری، پھر تیسری۔ رات کے دو بج جاتے ہیں، فجر قضا ہو جاتی ہے، آنکھوں کی شرم ختم ہو جاتی ہے۔

نفس کہتا ہے، اپنی تصویریں لگا کر لوگوں سے تعریف لو۔ اس شہرت کی خواہش میں انسان اپنی عزت، اپنی حیا، اپنا وقت سب برباد کر دیتا ہے۔

نفس کہتا ہے، لوگوں سے آگے نکلنے کے لیے حسد کرو، غیبت کرو، کسی کو نیچا دکھاؤ۔ اس انا کی خواہش میں انسان رشتے توڑ دیتا ہے، دوستوں سے لڑتا ہے، ماں باپ کی نافرمانی کرتا ہے۔

یوں دیکھا جائے تو آج ہر طرف نفس کی حکومت نظر آتی ہے۔ جس نے اپنے نفس کو قابو کر لیا، وہی اس دور کا اصل بہادر ہے۔

عقل کو کیسے بچائیں؟

نفس کو مارنا نہیں ہے، اس کو قابو کرنا ہے۔ جیسے گھوڑے کو لگام دی جاتی ہے، ویسے ہی نفس کو لگام دینی ہے۔

سب سے پہلا علاج نماز ہے۔ نماز انسان کو دن میں پانچ بار اللہ کی یاد دلاتی ہے۔ جو انسان سچے دل سے نماز پڑھتا ہے، اس کی عقل مضبوط ہوتی ہے اور نفس کمزور ہوتا ہے۔

دوسرا علاج اچھی صحبت ہے۔ انسان جیسے لوگوں میں بیٹھتا ہے ویسا ہی بن جاتا ہے۔ اگر آپ کے دوست گناہ کی طرف بلاتے ہیں تو آپ بھی گناہ میں پڑ جائیں گے۔ اگر آپ کے دوست نیک ہیں، تو آپ کی عقل بھی مضبوط رہے گی۔

تیسرا علاج اپنے آپ کو مصروف رکھنا ہے۔ زیادہ تر گناہ فارغ وقت میں ہوتے ہیں۔ جب انسان اکیلا اور فارغ ہوتا ہے تو شیطان اس پر زیادہ حملہ کرتا ہے۔ اس لیے اپنے وقت کو کام، پڑھائی، خاندان اور اللہ کے ذکر میں گزاریں۔

چوتھا علاج روزہ ہے۔ روزہ نفس کو کمزور کرتا ہے۔ جو انسان بھوک کو برداشت کرنا سیکھ لیتا ہے، وہ اپنی خواہشات کو بھی برداشت کرنا سیکھ لیتا ہے۔

پانچواں علاج موت کو یاد کرنا ہے۔ جب انسان یہ سوچتا ہے کہ ایک دن اسے قبر میں جانا ہے، اللہ کے سامنے کھڑا ہونا ہے، تو اس کا نفس ڈر جاتا ہے اور عقل جاگ جاتی ہے

۔

نتیجہ

نفسانی خواہشات انسانی عقل کی دشمن ہوتی ہیں، یہ بات سو فیصد سچ ہے۔ لیکن یہ بھی سچ ہے کہ جو انسان اپنے نفس کو قابو کر لیتا ہے، وہ دنیا میں بھی کامیاب ہوتا ہے اور آخرت میں بھی۔

اصل کامیابی یہ نہیں کہ انسان کے پاس کتنا پیسہ ہے، کتنی شہرت ہے۔ اصل کامیابی یہ ہے کہ انسان اپنے نفس کا غلام نہ بنے، بلکہ اپنے نفس کا مالک بنے۔

جس دن انسان نے اپنے نفس کو کہنا سیکھ لیا کہ نہیں، میں یہ گناہ نہیں کروں گا، اللہ مجھے دیکھ رہا ہے، اس دن سے اس کی زندگی بدل جائے گی۔ اس کے دل کو سکون ملے گا، اس کے گھر میں برکت آئے گی، اور اس کی آخرت سنور جائے گی۔

اس لیے آج سے یہ فیصلہ کریں کہ خواہش آپ کی مالک نہیں ہوگی، آپ خواہش کے مالک ہوں گے۔ اللہ کو راضی کرنے کے لیے نفس کو ناراض کرنا پڑے تو کر دیں، کیونکہ نفس کی ناراضگیعارضی ہے، لیکن اللہ کی ناراضگی ہمیشہ کی تباہی ہۓ۔

مصنفہ: تابندہ بانو