Namaz Islam ka doosra sab se bara rukun hy. Toheed ky baad agar kisi cheez ka sab se zyada hukm diya gaya hy to wo Namaz hy. Quran Pak me 700 se zyada martaba Namaz ka zikr Aaya hy, is se hi andaza lagaya ja sakta hy ke Allah Pak ke nazdeek Namaz kitni Aham hY.
Namaz sirf uthak baithak ka naam nahi hy. Namaz Allah se mulaqat ka zariya hy. Jab banda Namaz me khara hota hy to wo seedha Allah se baat kar raha hota hy. Duniya ki tamam pareshaniyan, dukh, takleef, sab Namaz me Allah ke samne rakh diye jate hy.
Namaz Ki Ahmiyat
Hadees me aata hy ky Qayamat ky din sab sy pehle Namaz ka hisab hoga. Jis ki Namaz durust nikli, us ka baaki hisab bhi aasan ho jayega.
Namaz insan ko gunahon se bachati hy. Quran me Allah Pak farmata hy ke beshak Namaz behayai aur bure kaamon se rokti hy. Jo shakhs pabandi se 5 waqt ki Namaz parhta hy, us ke dil me khud hi bure kaamon se nafrat paida ho jati hy.
Namaz Or Hamari Zindagi
Aaj kal hum sab pareshan hay. Kisi ko job ki tension hy, kisi ko paiso ki, kisi ko rishton ki. Hum logon ke paas ja ke apna dukh sunate hy, lekin jo asal sunne wala hy, us ke paas nahi jate. Wo hY Allah Paak. Aur Allah se baat karne ka behtareen waqt Namaz hY.
Subah ki Fajr insan ko din bhar ki taqat deti hy. Fajr parh ke din shuru karne se dil me sukoon aur kaam me barkat Aati hY.
Zohar kaam ke beech me sukoon deti hy. Jab banda dopahar me sab kaam chor ke Allah ke samne khara hota hy to us ki thakan khatam ho jati hy.
Asr ki Namaz din ki sab se ahem Namaz me se ek hai. Asr ka waqt wo hota hai jab din dhal raha hota hai aur insan duniya ke kaamon me sab se zyada busy hota hai. Isi liye Allah ne Asr ki Namaz ki khaas hifazat ka hukm diya hai. Hadees me aata hai ke jis ki Asr ki Namaz reh gayi, us ka amal zaya ho gaya. Asr parhne se insan ki sham sukoon wali ho jati hai, dil ka bojh halka ho jata hai aur ghar me barkat aati hai.
Maghrib din ke khatam hone ka shukrana hai. Din bhar Allah ne jo diya, us ka shukar Maghrib me ada hota hai.
Aur Isha raat ka sukoon hai. Isha parh ke sone se neend bhi achi aati hai aur poora din Allah ki hifazat me guzar jata hai. Jo 5 waqt ki Namaz parhta hai, us ki zindagi me ek tarteeb aa jati hai.
Namaz Chorne Ka Nuqsan
Jab hum Namaz chorte hain to hum sirf ek farz nahi chorte, hum Allah se apna rishta kamzor kar lete hain. Phir dil bechain rehta hai, neend nahi aati, kaam me barkat nahi rehti. Is liye agar zindagi me sukoon chahiye to Namaz ko pakar lo.
Namaz ParhnY Ka Aasan Tareeqa - Namaz Ke Faraiz
Bohat se log kehte hain ke hume Namaz parhna nahi Aatii, is liye hum nahi parhte. Lekin Namaz seekhna bilkul mushkil nahi hai. Sab se pehle Wazu seekh lo. Wazu me haath, munh, baazu, sar ka masah aur paon dhona hota hai. Wazu ke baad saaf jagah par khare ho ke Niyat kar lo ke me Allah ke liye Namaz parh raha hu.
Phir Allah o Akbar keh ke haath bandh lo, Sana parho, Surah Fatiha parho aur us ke baad koi choti Surah parh lo. Phir Ruku me jao, Sajde me jao. Bas yehi poori Namaz hai. Shuru me agar Surah yaad nahi hai to mobile se dekh ke bhi parh sakte ho, ahista ahista sab yaad ho jayega. Allah niyat dekhta hai, galti nahi.
Namaz Me Dil Kaise Lagaye
Bohat log kehte hain ke Namaz me dil nahi lagta. Is ka hal ye hai ke jab Namaz parho to ye socho ke Allah tumhe dekh raha hai. Jaldi jaldi mat parho, aram se parho. Har lafz ka matlab samajh ke parho. Jab tum Surah Fatiha parhte ho to Allah us ka jawab deta hai. Ye soch ke parho ge to dil khud ba khud lag jayega.
Aur ek kaam karo, Namaz se pehle mobile ko side par rakh do. Duniya ke kaam Namaz ke baad bhi ho jayenge, lekin jo sukoon Namaz me hai wo kahin aur nahi milega. Aaj se pakki niyat kar lo ke 5 waqt ki Namaz kabhi nahi chorni.
Apny Bachon Ko Namaz Ki Aadat Kesy DalY.
Namaz ki aadat bachpan se hi dalni chahiye. Jab bacha 7 saal ka ho jaye to us ko pyar se Namaz ka kehna chahiye. Usko daant ke nahi, pyar se samjha ke Namaz parhayen. Jab bacha apne maa baap ko 5 waqt ki Namaz parhte dekhe ga to wo khud hi Namaz ki taraf aaye ga.
Ghar me ek kaam zaroor karen, jab Azan ho to TV, mobile sab band kar den aur sab mil ke Namaz parhen. Is se ghar me barkat aati hai aur bachon ke dil me bhi Namaz ki mohabbat paida hoti hai. Bachon ko batayen ke Namaz Allah se baat karne ka tareeqa hai. Jab unko koi cheez chahiye ho, koi pareshaani ho, to wo Sajde me Allah se maang len.
Yaad rakhen, jo aadat bachpan me lag jati hai wo poori zindagi saath rehti hai. Is liye aaj se hi apne ghar me Namaz ka mahol banayen. Khud bhi parhen aur apne bachon ko bhi parhayen. Allah hum sab ke gharo me Namaz ka noor paida kare. Ameen.
Namaz mushkil nahi hai. Shuru me sirf 5 minute lagte hain. Aaj se niyat karo ke chahe kuch bhi ho jaye, 5 waqt ki Namaz nahi chorni.
Aakhir me
Allah Paak se dua hai ke Allah Paak hum sab ko 5 waqt ka namazi banaye aur hamari zindagi me Namaz ka noor paida kare. Jo aaj se Namaz shuru kare ga, us ki zindagi me sukoon, barkat aur khushi khud ba khud aa jaye gi. InshaAllah.😇🤍
Comments 0
Sign in to join the conversation.
No comments yet. Be the first to say something.