Ek Adhoora Ghar, Ek Adhoori Mohabat Aur Ek Khamosh Zindagi

Kuch log apni puri zindagi dusron ke liye jeete hain. Jab pehli baar apne liye khawab sajate hain, to kabi kabi waqt unain wo khawab pure karne ki mohlat hi nahi deta.

Har bache ki zindagi ka aghaz ek jesi mohabat se nahi hota. Kuch bache duniya me aankh kholte hi ese sawalon ke sath jeena shuru kar dete hain jin ke jawab unain kabi nahi milte.

Ye kahani bi ek ese hi bache ki ha, jiski maa uski pedaish ke foran baad use chor kar chali gyi. Wo kun gyi, kis majburi me gyi, yan uske dil me kya tha—ye raaz aj tak kisi ko maloom nahi ho saka. Us bache ke paas maa ki koi yaad nahi thi, bas ek kami thi jo waqt ke sath uske andar gehri hoti chali gyi.

Baap ne kuch arse baad dusri shaadi kar li. Naye ghar me do aur bete paida hue. Lekin jis bache ko pehle hi din se mamta ki kami mili thi, uske liye dusri maa ka dil bi kabi puri taran na khul saka.

Wo usi ghar me rehta tha, magar aksar apnapan dhoondta rehta. Kabi choti choti zarurton ke liye tarasta, kabi dusron ke sakht alfaaz sunta aur kabi ese rawaiye ka samna karta jo kisi bache ke masoom dil ke liye bohat bhaari hota ha.

Uske baap ke dil me uske liye mohabat thi, lekin wo mohabat hamesha uska sahara na ban saki. Rozgar ki masrufiyat aur ghar ke halaat ke darmiyan baap aksar door rehta. Wo apne baap se bohat mohabat karta tha. Shayad isi mohabat ki waja se wo apne dukh kehne ke bajaye chup chaap seh leta.

Wo parhai me nihayat zaheen tha. Har jamaat me ache number leta, parhne ka shauq rakhta aur uske andar age barhne ki salahiyat bi thi. Lekin ghar ke halaat aur zimmedariyun ne uske taleemi safar ko adhura kar diya. Jis umar me bache apne khwabon ke peeche bhaagte hain, us umar me usne zimmedariyun ka bojh uthana shuru kar diya.

Duniya ne us se sirf maa ki mamta nahi cheeni thi; dheere dheere uska bachpana aur masoomiyat bi us se door hoti gyi.

Baap ka bicharna , ek aur tanhai

Waqt guzarta raha. Uske sautele bhai jawan hue. Ghar ke halaat badalte rahe, lekin uske dil me apne baap ke liye mohabat kam na hui.

Phir ek din baap bi duniya se chala gya.

Ye uske liye sirf baap ka inteqal nahi tha. Wo shakhs bi chala gaya jis se wo sab se zyada mohabat karta tha, jiski tawajo ka intezar shayad usne apni poori zindagi kiya tha.

Ab wo apne hi ghar me bilkul tanha tha.

Baap ke purane business par bi uska haq aur qabza baqi na raha. Sautele bhaiyun ne baap ko jazbati tor par apne asar me lekar business apne hath me kar liya. Jaidad ka waqt aya to usne apna hissa bi apni marzi se un sab ko de diya. Usne na larai ki, na apna ghar chora. Bas usi ghar me alag rehne laga.

Shayad wo ab kisi se apna haq mangne ke bajaye apni pehchan khud banana chahta tha.

Nafrat ke bajaye khidmat

Uski sauteli maa bemaar hui to use apne beton ki wo tawajo na mili jo ek bemar maa ko chahiye hoti ha. Lekin jis bache ke sath usne zindagi bhar na-insafi ki thi, wo uski khidmat ke liye khara raha.

Usne us aurat ki dekh bhaal ki. Uske paas raha aur apni taraf se koi kasar na chori.

Akhri waqt me us aurat ko apni zyadtiyun ka ehsas hua. Usne us se maafi mangi.

Us bache ka jawab tha:

“Ap meri maa hain, muje apse koi gila nahi”

Ye alfaz sirf maafi dene ka izhar nahi the. Ye uske andar ki us narmi ka saboot the jo itni takleefon ke bawajud zinda rahi.

Jis aurat se use kabi maa jesi mamta na mili, uske akhri waqt me usne usi ko maa ka darja de kar rukhsat kiya. Lekin us aurat ke chale jane ke baad bi uske apne beton ko shayad uski qadar ka wo ehsas na hua jo hona chahiye tha.

Apni mehnat se banayi hui duniya

Phir usne apne aap ko kaam me laga diya.

Business uski duniya ban gya. Din raat ki mehnat, lagan aur sabr se usne apna kaam khara kiya. Dheere dheere uska naam bana, maqam bana, log uski izzat karne lage aur uske shagird bi tayar hue.

Lekin kamyabi ne uske mizaj ko sakht nahi kiya.

Wo apne shagirdon ki izzat karta, unki madad karta, dusron ke kaam ata aur zaruratmandon ke liye apni haisiyat ke mutabiq asani paida karta. Bachon se use khaas mohabat thi. Apne sautele bhaiyun ke bachon ko bi usne bohat pyaar diya. Unki zaruraton ka khayal rakha aur kisi cheez ki kami mehsus na hone di.

Apni bhabhi ka bi bohat ehtaram karta tha. Wo uske liye maa jesi thi; uska khayal rakhti aur uski fikr karti thi. Lekin usne apne dil ka har raaz unse bi share nahi kiya.

Usne apne bachpan ke zakham kisi ko nahi dikhaye. Logon ke samne wo ek kamyab, mazboot aur madadgar shakhs tha. Apne andar ka dard, maa ki kami, bachpan ki ruswaiyan aur choti choti khawaishon ke liye tarasne ki kahani wo sirf ek shakhs ko sunata tha.

Wo shakhs thi—Princess

Jab zindagi me pehli baar apna khawab aya

Princess uski zindagi me achanak ayi. Aur phir ese uske dil me utar gyi ke uski soch, uske din aur uski tanhai sab me uska zikr shamil ho gya.

Uski zindagi me Princess ke siwa koi aur nahi tha. Wo use apni Princess kehta tha. Usne apne dil ki har baat uske samne rakh di—apna bachpan, maa ko dekhne ki khawaish, baap se mohabat, ghar walon ki zyadtiyan, apni tanhai aur wo sab dard jo usne duniya se chupa kar rakhe the.

Wo Princess se shaadi karna chahta tha. Lekin wo jaldbazi nahi kar raha tha. Sahi waqt ka intezar kar raha tha aur chahta tha ke sab kuch munasib, izzat aur halal tareeqe se ho.

Usne apni chahat ko Allah ke hawale kar diya. Uski dua thi:

“Ya Allah, agar hum dono ka saath likha ha to hume munasib tareeqe se mila de. Aur agar humara sath nahi likha, to hum dono ke dilon ko ek dusre ke khayal se khali kar de.”

Wo sirf dua hi nahi kar raha tha, apni zindagi ko bi behtar bana raha tha. Logon ki madad aur zyada karne laga, naik kaam karta, duaein leta aur apne Rab se umeed jorh kar rakhta.

Usne Princess ke liye ek naya ghar bi banwana shuru kar diya tha. Wo sirf intezar nahi kar raha tha; wo apne mustaqbil ki tayari kar raha tha. Usne gaarhi bi li aur dusri cheezain bi jama keen. Uska khawab tha ke jab Pari uski zindagi me aye to wo use khushi, sukoon aur apnapan de.

Shayad wo chahta tha ke jis shakhs ne apni zindagi me itni kamiyan dekhi hn, wo apni humsafar ko kisi kami ka ehsas na hone de.

Princess bhi uske dard ko samajti thi. Wo chahti thi ke uske bachpan ke zakhmon par marham rakh sake, use wo sukoon de sake jiski talash me usne apni zindagi ka bohat sa hissa guzar diya tha.

Dono ek mustaqbil ki taraf dekh rahe the. Ek ghar tha jo ban raha tha, ek shaadi jis ka intezar tha, aur do dil the jo apni duaon me ek doosre ko mang rahe the.

Ek khabar jisne sab kuch rok diya

Phir achanak ek accident hua.

Aur wo shakhs is duniya se chala gya.

Na usay apne banaye hue ghar me Princess ko lane ka moqa mila, na shaadi ka khawab pura hua, na wo apni humsafar ke saath zindagi guzar saka. Jis shakhs ne pehli baar apne liye itni khushi se kuch sajaya tha, uski sari tayariyan adhuri reh gayin.

Princess us waqt us se door thi. Use uske accident aur inteqal ki khabar kisi apne ke samne beth kar nahi, balke news ke zariye mili.

Kabi kabi ek choti si screen par nazar ane wale chand alfaz insan ki puri duniya badal dete hain.

Uski mohabat ka raaz sirf Princess janti thi. Na uske ghar walon ko is shaadi ki khwahish ka ilm tha, na uske shagirdon ko, na uski bhabhi ko. Duniya ne use ek kamyab business man aur naik insan ke taur par dekha, Lekin uske dil ka wo kona sirf Princess ke liye tha.

Uske chale jane ke baad Pari ke paas na koi mukammal jawab tha, na koi akhri mulaqat, na wo ghar jahan dono ne apna mustaqbil socha tha. Uske paas bas yaadain aur ek dua reh gayi:

“Ya Allah, muje apka har faisla qubool ha.Agar duniya me hamara sath nahi likha tha, to jannat me hume mila dena.”

Kuch khawab adhoore reh kar bi zinda rehte hain

Uski zindagi ko dekhain to ek ajeeb si sachai samne ati ha.

Bachpan me maa ki mamta na mili, lekin usne dusron ko mohabat dena nahi chora. Ghar me na-insafi sahi, lekin dusron ke sath insaf aur izzat ka rawaiya rakha. Apna haq chor diya, lekin mehnat kar ke apni pehchan bana li. Jis aurat ne uske sath zyadti ki, uske akhri waqt me uski khidmat ki. Jis ghar me usay apnapan kam mila, usi ghar ke bachon ko bepanah pyaar diya.

Aur jab pehli baar usne apne liye ek ghar, ek humsafar aur ek mustaqbil ka khawab dekha, to wo khawab pura hone se pehle hi toot gya.

Shayad uski kahani hume ye yaad dilati ha ke kisi insan ki khamoshi ko uski be-hissi na samja jaye. Har kamyab chehre ke peeche ek purani kahani ho sakti ha. Har muskurata insan andar se mukammal nahi hota. Aur har wo shakhs jo sab ka sahara banta ha, zaroori nahi ke uske paas apna sahara bi ho.

Bachon ko sirf roti, kapra aur taleem nahi chahiye hoti; unain izzat, tawajo, apnapan aur bina shart mohabat bi chahiye. Kisi bache ko ghar me rehne dena aur use ghar ka hissa mehsus karwana do alag baatain hain.

Aur mohabat… mohabat sirf kisi ko pa lene ka naam nahi. Kabi kabi wo ek dua ban kar reh jati ha, ek esa khwab jo duniya me mukammal nahi hota, lekin kisi ke dil me apni jaga hamesha ke liye bana leta ha.

Wo apna ghar mukammal na kar saka. Apni Princess ke sath zindagi na guzar saka. Lekin apne kirdaar se usne bohat se dilon me jagah banayi.

Kuch log duniya se chale jate hain, lekin unki di hui mohabat, unki naiki aur unke adhoore khawab unain yaadon me zinda rakhte hain.

Allah uski maghfirat farmaye, uski naikiun ko qabool kare, aur us Princess ko sabr aur sukoon ata farmaye. Ameen.

— Rooh Ki Awaz